MI, MARINAIA!
Un racconto di Annamaria Marincovich
A Fiume gavevimo una barca de m. 13 x 3,50, ierimo vizin de el yate de Grattoni, el posto iera: vardando el mar dal caffè Centrale, a sinistra un 30 m. La barca sse ciamava come mi, el foribordo che vegniva drio, iera el Marina, con questo, giravo per el porto e anche un poco fora La unica roba, me costava un poco meter el foribordo in marcia, perché dovevo tirar de la cordisela che per mi, la iera un poco dura.Papa me diseva: sse te se ferma el motor, niente paura, meti su i remi e torna indrio, e ricordite: con la proa, taja le onde. Molte volte, papá me gá lassado el timon de la barca, sse s´lui me iera vizin. Furio, ti me domandi se iero anche marinaia? Me gavessi piazudo molto. Co andavimo a pescar, de sera butavimo la nassa, el parangal e la rede. Più de una volta me gó sponsà qualche dito per meter la esca nei ami che i iera molti. A la matina presto, se tirava sù tuto quel che serviva per magnar, el resto tornava in mar, meno le aragoste che le mantegnivimo nela nassa fin el ritorno.
Ve contaró una vera: in una dele gite, gavevo molto caldo, e mio papá no voleva fermar per far el bagno e rinfrescarse un poco. Alora me gó sentá a popa, e tirando de la corda gó visiná el foribordo, e son saltada dentro. Fin quá,. niente strano fin che me xé vegnuda la idea de ciaparme ben forte de la popa dela barcheta, e calarme in acqua. Imagineve: un dopopranzo de estate, pien de sol; zel e mar de sogno. ma…in mar aperto. Una gioia. La gioia xé finida quando gó voludo montar in barcheta, la velocitá del motor de la barca granda, no me lassava. Gente mia: che fifa! Bona de Dio, che in un momento i sse gá acorto che no iero in barca, alora papá gá fermá el motor quando el gá visto due mani disperadamente ciapade sula popa de la barcheta. Mia mamma, spaventada come anche i amici che i iera a bordo.Dopo tuto quel che i me gá deto che poteva esserme suceso, gavevo piú paura de prima che i me tirassi sú, e le parole de mio papá xé stade: pecá che no te gá magna un pesecan!
Son marinaia o nó?
ANNAMARIA MARINCOVICH, Gruppo Esuli ed Emigrati Giuliani – Buenos Aires